Չինաստանը սպառնում է պատասխան քայլերով ԵՄ նոր օրենքի պատճառով

Այս քաղաքականությունը ներկայացվում է «Գնիր եվրոպականը» մոտեցման շրջանակում։

Չինաստանը քննադատել է Եվրամիության «Արդյունաբերական արագացման մասին» նոր օրենքը՝ այն համարելով խտրական օտարերկրյա, հատկապես չինացի ներդրողների նկատմամբ։

Չինաստանի առևտրի նախարարությունը հայտարարել է, որ եթե ԵՄ-ն շարունակի առաջ տանել այս օրինագիծը՝ վնաս հասցնելով չինական ընկերությունների շահերին, Պեկինը ստիպված կլինի պատասխան միջոցներ ձեռնարկել։

Նշվում է, որ օրենքը սահմանափակումներ է ստեղծում օտարերկրյա ներդրողների համար՝ ներառյալ մտավոր սեփականության փոխանցման պահանջները և պետական գնումներին մասնակցության սահմանափակումները։

Չինական կողմը կոչ է արել ԵՄ-ին վերանայել օրինագիծը և հեռացնել խտրական դրույթները՝ ապահովելու արդար մրցակցություն և ներդրումային հավասար պայմաններ։

Եվրահանձնաժողովի նախաձեռնած օրինագիծը նախատեսում է առաջնահերթություն տալ եվրոպական արտադրանքին՝ հատկապես պաշտպանական, թվային և արդյունաբերական ոլորտներում պետական պայմանագրերի դեպքում։

Օրենքը նաև սահմանում է եվրոպական բաղադրիչների օգտագործման պարտադիր ցուցանիշներ մի շարք ռազմավարական ոլորտներում՝ ներառյալ վերականգնվող էներգիան, մարտկոցները և ավտոմոբիլային արդյունաբերությունը։

Այս քաղաքականությունը ներկայացվում է «Գնիր եվրոպականը» մոտեցման շրջանակում, որը նպատակ ունի խթանել տեղական արտադրությունը և նվազեցնել կախվածությունը արտաքին մատակարարներից։

Սակայն Պեկինը զգուշացնում է, որ նման քայլերը կարող են լուրջ ազդեցություն ունենալ երկկողմ տնտեսական հարաբերությունների վրա։