ՀՀ-ԵՄ ռազմավարական օրակարգի ընդունումը կարևորում է Բրյուսելի աջակցությունը ՀՀ կառավարության «Խաղաղության խաչմերուկ» նախագծին. Գրոնո

Գրոնոյի խոսքով՝ ռազմավարական օրակարգը ներառում է ուղղությունների լայն շրջանակ:

Հայաստան-Եվրամիություն Գործընկերության ռազմավարական օրակարգի ընդունումը պատասխան էր ԵՄ-ի հետ կապերի խորացման՝ Հայաստանի արտահայտած հավակնություններին և արտացոլում էր երկկողմ հարաբերությունների աճող դինամիկան։ Այս մասին «ԱՊԱ» գործակալությանը տված հարցազրույցում հայտարարել է Հարավային Կովկասի հարցերով Եվրամիության հատուկ ներկայացուցիչ Մագդալենա Գրոնոն։

Գրոնոյի խոսքով՝ ռազմավարական օրակարգը ներառում է ուղղությունների լայն շրջանակ՝ ժողովրդավարություն և իրավունքի գերակայություն, դատական համակարգի բարեփոխումներ, մարդու իրավունքներ, սոցիալ-տնտեսական զարգացում, կապակցվածություն, էներգետիկ անվտանգություն, թվային փոխակերպում, առևտրի դիվերսիֆիկացում, ինչպես նաև անվտանգության և պաշտպանության ոլորտում նոր համագործակցություն։

Նա ընդգծել է նաև Ղարաբաղից հեռացած հայերի սոցիալական և տնտեսական ինտեգրմանն աջակցելու կարևորությունը Հայաստանի հասարակության մեջ։

ԵՄ ներկայացուցիչը նշել է, որ փաստաթուղթը կարևորում է նաև Global Gateway ծրագրի շրջանակում ռազմավարական ներդրումները և աջակցությունը ՀՀ կառավարության «Խաղաղության խաչմերուկ» նախաձեռնությանը։

Անդրադառնալով Հայաստանում ԵՄ քաղաքացիական դիտորդական առաքելությանը՝ Գրոնոն ասել է, որ մանդատի և գործունեության ապագայի վերաբերյալ քննարկումները կանցկացվեն Երևանի և Բրյուսելի միջև՝ հաշվի առնելով խաղաղության գործընթացի զարգացումները։

Հայաստան-Ադրբեջան խաղաղության գործընթացի վերաբերյալ նա նշել է, որ 2025 թվականի օգոստոսի 8-ին խաղաղության համաձայնագրի նախաստորագրումից հետո արձանագրվել են մի շարք դրական քայլեր, որոնք Եվրամիությունը ողջունել է։