Ադրբեջանը սպասում է ամբողջական կարգավորմանը, նոր սկսեն մեր ճանապարհներից օգտվել. Պապոյան

Ադրբեջանցիները այսպես, թե այնպես իրենց համար ճանապարհ ունեն, բայց ես վստահ եմ, որ ինչ-որ փուլում իրենք օգտվելու են մեր ճանապարհներից։

Այս մասին, այսօր՝ դեկտեմբերի 15–ին, ԱԺ–ում լրագրողների հետ զրույցում նշեց Էկոնոմիկայի նախարար Գևորգ Պապոյանը՝ անդրադառնալով հարցին, թե Ինչո՞ւ Ադրբեջանը չի արձագանքում Հայաստանի առաջարկին՝ կապված Հայաստանի ճանապարհներից օգտվելու հետ։

«Ես ենթադրում եմ, որ սպասում են ամբողջական կարգավորմանը, որից հետո նոր կօգտվեն մեր ճանապարհներից։ Մտահոգություն բացարձակ ես չեմ տեսնում, պարզապես մոտեցման խնդիր է։ Իրենք կարծում են, որ պետք է ամեն ինչ ավարտել ու միանգամից, մենք կարծում ենք, որ կարելի է զուգահեռ անել»,–ասաց նա։

Հարցին՝ շահավետության առումով որքանով է ձեռնտու Ադրբեջանի տարածքով ցորեն ներկրելը, Պապոյանը պատասխանեց. «Մի այսպիսի իրավիճակ կնկարագրեմ: Ուրեմն, նախորդ տարի այս ժամանակ, ես նայում եմ ինվոյսները, 190-200 դոլարով էինք Ռուսաստանից սահմանին ստացել ցորենը։ Այսօր ցորենի գները 275 է, գինը բարձրացել է։ Հիմա սա կարո՞ղ է, օրինակ, նպաստել, որ ավելի արագ ստանանք, ավելի անխափան ստանանք, 10 կամ 20 դոլար օրինակ ավելի էժան ստանանք, այո։ Ես ուզում եմ ասել այլ գործոնները ավելի շատ են ազդում, մենք այստեղ կարող է այս եղանակով 20 դոլար գինը իջեցնենք, բայց տեսեք այն մի գործոնով մինչև 85 դոլար գինը բարձրացել է։

Կարո՞ղ ենք ակնկալել, որ ավելի էժան կլինի, այո, ավելի էժան կլինի, ավելի արագ կլինի։ Դրան կարող է հաջորդել հաջորդ տրամաբանական հարցը, թե դա հացի գնի վրա ինչքա՞ն է ազդելու։ Ես այդ հարցին չեմ կարող պատասխանել։ Այսինքն, այնքան շատ գործոններ է ազդում։

Օրինակ, ասենք, Լարսը փակվել է, որովհետև ձնաբուք կամ սելավ է, մենք ի՞նչ ենք անում։ Սկսում ենք մեր պահուստային ցորենը օգտագործել, հակառակ դեպքում երկրում հաց չի լինի։ Հիմա էս դեպքում մենք էդ պահուստին ցորենին չենք գնա։ Բա որ Լարսը ամսով չվերանորոգեն, ի՞նչ ենք ունենալու»։