ՀՀ բանկային վարկերը հասել են 8 տրլն դրամի՝ մեկ տարում աճելով 23%-ով

Ռեզիդենտներին տրամադրված վարկերի կառուցվածքում գերակշռում են դրամային վարկերը

2026 թվականի փետրվարի վերջի դրությամբ Հայաստանի առևտրային բանկերի վարկային պորտֆելը կազմել է շուրջ 8.04 տրլն դրամ։

Վիճակագրական կոմիտեի տվյալներով՝ ցուցանիշը մեկ տարվա ընթացքում աճել է 1.5 տրլն դրամով կամ 23%-ով։

Վարկերի հիմնական մասը տրամադրվել է ռեզիդենտներին՝ 7.68 տրլն դրամ, մինչդեռ ոչ ռեզիդենտներին բաժին է ընկնում մոտ 354.6 մլրդ դրամ։

Ռեզիդենտներին տրամադրված վարկերի կառուցվածքում գերակշռում են դրամային վարկերը՝ կազմելով ընդհանուրի 68.1%-ը կամ ավելի քան 5.23 տրլն դրամ։ Դրանց ծավալը տարեկան աճել է 20.6%-ով։

Տարադրամով վարկերը կազմում են 31.9% կամ շուրջ 2.45 տրլն դրամ՝ գրանցելով ավելի բարձր՝ 24.2% աճ։

Տվյալները ցույց են տալիս վարկավորման ակտիվության զգալի աճ՝ ինչպես ազգային, այնպես էլ արտարժույթով հատվածներում։