Հայաստանը ՄԱԿ-ում ներկայացրել է զարգացման ֆինանսավորման իր մոտեցումները

Ներկայացված մոտեցումները ուղղված են միջազգային համագործակցության ընդլայնմանը և ներդրումային միջավայրի բարելավմանը։

ՀՀ ֆինանսների նախարարի տեղակալ Էդգար Մկրտչյանը ՄԱԿ-ի Տնտեսական և սոցիալական խորհրդի հովանու ներքո անցկացվող զարգացմանն ուղղված ֆինանսավորման ֆորումում հանդես է եկել ելույթներով՝ ներկայացնելով Հայաստանի ռազմավարական մոտեցումները։

Ֆինանսների նախարարության փոխանցմամբ՝ Մկրտչյանը բացման խոսքով հանդես է եկել դեպի ծով ելք չունեցող զարգացող երկրների համար ենթակառուցվածքների ֆինանսավորմանը նվիրված միջոցառմանը։

Նրա խոսքով՝ ենթակառուցվածքները նման երկրների տնտեսական զարգացման առանցքային նախապայմաններից են, սակայն ֆինանսավորման բացերը շարունակում են սահմանափակել առաջընթացը։

Մկրտչյանը նշել է, որ գործող ֆինանսական գործիքները հաճախ չեն բավարարում այդ երկրների առանձնահատուկ կարիքներին, և անհրաժեշտ է նոր, նպատակային մեխանիզմների ձևավորում։

Ֆորումի շրջանակում ՀՀ պատվիրակությունը հանդիպումներ է ունեցել նաև միջազգային ֆինանսական կազմակերպությունների ներկայացուցիչների հետ։

Քննարկվել են Հայաստանի տնտեսական բարեփոխումների ընթացքը և զարգացման ֆինանսավորման նորարարական գործիքների կիրառման հնարավորությունները։

Ներկայացված մոտեցումները ուղղված են միջազգային համագործակցության ընդլայնմանը և ներդրումային միջավայրի բարելավմանը։