Ապրիլի 18-ին Հայաստանում կանցկացվեն միջոցառումներ՝ նվիրված հուշարձանների միջազգային օրվան

Ծրագրի նպատակն է բարձրացնել հանրության տեղեկացվածությունը մշակութային ժառանգության արժեքի և դրա պահպանության անհրաժեշտության վերաբերյալ։

Ապրիլի 18-ին նշվում է Հուշարձանների և տեսարժան վայրերի միջազգային օրը։ Օրվա շրջանակում Հայաստանում նախատեսված են միջոցառումներ՝ ԿԳՄՍ նախարարության համակարգմամբ։

Ծրագրում ներառված են տեղեկատվական արշավներ, էքսկուրսիաներ, քայլարշավներ, ճանաչողական այցեր հուշարձաններ, ինչպես նաև կրթական ծրագրեր դպրոցականների համար՝ բաց դասերի, վիկտորինաների և դասախոսությունների ձևաչափով։

Միջոցառումների մի մասը վերաբերում է նաև հուշարձանների և հարակից տարածքների մաքրման աշխատանքներին, որոնք իրականացվում են մարզային ծառայությունների և պատասխանատու կառույցների միջոցով։

Ծրագրի նպատակն է բարձրացնել հանրության տեղեկացվածությունը մշակութային ժառանգության արժեքի և դրա պահպանության անհրաժեշտության վերաբերյալ։ Առանձին շեշտադրում է արվում դպրոցականների մասնակցության վրա՝ որպես կրթական գործընթացի հավելյալ բաղադրիչ։

Հուշարձանների միջազգային օրը սահմանվել է ՅՈՒՆԵՍԿՕ-ի կողմից 1983 թվականին՝ ԻԿՕՄՕՍ-ի առաջարկությամբ։ Այն նշվում է տարբեր երկրներում՝ նպատակ ունենալով խթանել մշակութային ժառանգության պահպանության և հանրահռչակման գործընթացները։