Apple-ի «խելացի» ձախողումը. ընկերությունը 250 միլիոն դոլար կվճարի iPhone-ի օգտատերերին՝ AI-ի գովազդային ստի համար

Փոխհատուցման ծրագիրը տարածվում է ԱՄՆ-ում 2024-ի հունիսից մինչև 2025-ի մարտը վաճառված շուրջ 37 միլիոն սարքերի վրա։

Տեխնոլոգիական հսկա Apple-ը համաձայնել է վճարել 250 միլիոն դոլար՝ կարգավորելու համար այն կոլեկտիվ հայցը, որով ընկերությունը մեղադրվում էր Apple Intelligence համակարգի հնարավորությունները չափազանցված ներկայացնելու մեջ։ Հայցվորները պնդում էին, որ iPhone 16-ի և Siri-ի նորացված տարբերակի գովազդային արշավը չի համապատասխանել իրականությանը, և օգտատերերը ձեռք են բերել թանկարժեք սարքեր՝ ակնկալելով ֆունկցիոնալություն, որն այդպես էլ լիարժեք չի գործել։

Փոխհատուցման ծրագիրը տարածվում է ԱՄՆ-ում 2024-ի հունիսից մինչև 2025-ի մարտը վաճառված շուրջ 37 միլիոն սարքերի վրա։ Խոսքը iPhone 15 Pro, 15 Pro Max և iPhone 16 մոդելների մասին է։ Օգտատերերը կարող են ակնկալել 25-ից մինչև 95 դոլար փոխհատուցում՝ յուրաքանչյուր սարքի համար։ Ընկերությունը մոտ ժամանակներս կսկսի իրազեկման գործընթացը՝ էլեկտրոնային հասցեների միջոցով։