Apple-ի տնօրենը կփոխվի

Apple-ի տնօրենը կփոխվի

Apple-ը հայտարարել է գլխավոր տնօրենի փոփոխության մասին։ Սեպտեմբերի 1-ից այդ պաշտոնը կզբաղեցնի Ջոն Թերնուսը։

Թիմ Կուկը, որ 2011 թվականին Սթիվ Ջոբսի հրաժարականից հետո ղեկավարել է ընկերությունը, կդառնա տնօրենների խորհրդի գործադիր նախագահ։

«Ջոն Թերնուսը, ում 25-ամյա ներդրումը Apple-ում անգնահատելի է, ամենահարմար մարդն է ընկերությունը ղեկավարելու համար»,- ասել է Կուկը։

65-ամյա Կուկը Apple է եկել 1998 թվականին։ Նրա ավելի քան 14-ամյա ղեկավարության ընթացքում ընկերության կապիտալիզացիան աճել է 350 մլրդ դոլարից մինչև 4 տրլն դոլար, իսկ եկամուտը՝ 108 մլրդ դոլարից (2011 թվական) մինչև 416 մլրդ դոլար անցյալ ֆինանսական տարում։

Կուկի օրոք Apple-ը թողարկել է Apple Watch-ը, AirPods-ը և Apple Vision Pro-ն, ինչպես նաև գործարկել է iCloud, Apple Pay, Apple TV և Apple Music ծառայությունները։

50-ամյա Ջոն Թերնուսը Apple-ի ավագ փոխնախագահն է՝ սարքավորումների մշակման գծով։ Նա ընկերությանը միացել է 2001 թվականին և կարևոր դեր է խաղացել Mac համակարգիչների վաճառքների վերականգնման գործում, որոնք վերջին տարիներին էապես մեծացրել են իրենց շուկայական մասնաբաժինը։

Թերնուսը 2021 թվականից ղեկավարում է սարքավորումների ինժեներական ստորաբաժանումը և 25 տարի է՝ զբաղվում է Apple-ի արտադրանքի մշակմամբ։ Ավելի վաղ Bloomberg-ը հայտնել էր, որ հենց նա է համարվում Կուկի հավանական հաջորդը։

Թերնուսը նույն տարիքում է, ինչ Կուկն էր, երբ նա Սթիվ Ջոբսից ստանձնեց գլխավոր տնօրենի պաշտոնը։