636 էլեկտրաշարժիչով ավտոմեքենաների հայտարարատու կարող է հետ ստանալ 2025-ին վճարված մաքսատուրքը. հրապարակվել է ցանկը

Դիմումը պետք է ներկայացվի բացառապես հայտարարատու հանդիսացած սուբյեկտի կողմից:

ՀՀ պետական եկամուտների կոմիտեն տեղեկացնում է, որ ՀՀ կառավարության 2024 թվականի նոյեմբերի 28-ի N 1876-Ն որոշման համաձայն՝ ավտոարտադրողի հետ կնքված դիլերական-դիստրիբյուտորական պայմանագրի շրջանակում ներմուծում իրականացնող սուբյեկտները մինչև 2025 թվականի դեկտեմբերի 31-ը ներառյալ չեն օգտվել 636 տրանսպորտային միջոցի համար նախատեսված սակագնային արտոնությունից։

Նշվում է, որ նախատեսված 3000 տրանսպորտային միջոցից սակագնային արտոնությամբ օգտագործվել է 2364-ը, ինչի արդյունքում մնացել է 636 չօգտագործված միավոր։

Կառավարության նույն որոշման 2.2 կետի համաձայն՝ Պետական եկամուտների կոմիտեն հրապարակել է այն տրանսպորտային միջոցների ցանկը, որոնց հայտարարատուները կարող են մաքսային հայտարարագրի և (կամ) մաքսային մուտքի օրդերի փոփոխման միջոցով օգտվել սակագնային արտոնությունից՝ ԱՏԳ ԱԱ 8703 80 000 2 ծածկագրին դասվող էլեկտրաշարժիչով տրանսպորտային միջոցների ներմուծման համար։

Այսպիսով, ցանկում ներառված 636 տրանսպորտային միջոցների հայտարարատուները կարող են հետ ստանալ արդեն վճարված մաքսատուրքի գումարը։ Ցանկը կազմված է ժամանակագրական հաջորդականությամբ՝ ըստ մաքսային հայտարարագրի կամ մուտքի օրդերի գրանցման օրվա, ժամի և րոպեի։

Սակագնային արտոնությունը վերականգնելու նպատակով հայտարարատուները պետք է մինչև 2026 թվականի հունվարի 31-ը ներառյալ դիմեն մաքսային մարմին՝ [email protected] էլեկտրոնային հասցեին ուղարկելով համապատասխան դիմում։

Կոմիտեն ընդգծում է, որ դիմումը պետք է ներկայացվի բացառապես հայտարարատու հանդիսացած սուբյեկտի կողմից, իսկ դիմումում նշված բանկային հաշվեհամարը պետք է պատկանի նույն սուբյեկտին։