2026 թվականի դեկտեմբերին այդ երևույթը չի լինելու. Փաշինյանը՝ հեղուկ գազի գնի թանկացման մասին

Շուկան առաջիկայում կադապտացվի նոր պայմաններին։

ՀՀ կառավարությունում քննարկվել է հեղուկ գազի գնի բարձրացման թեման։ Մրցակցության և սպառողների շահերի պաշտպանության հանձնաժողովի նախագահ Գեղամ Գևորգյանի խոսքով՝ հեղուկ գազի թանկացումը սեզոնային բնույթ ունի և կրկնվում է գրեթե ամեն տարի դեկտեմբերին։

Նա նշել է, որ գների աճը հիմնականում պայմանավորված է լոգիստիկ խնդիրներով, մասնավորապես՝ Վերին Լարսի անցակետում եղանակային բարդություններով, ինչի հետևանքով թանկանում են փոխադրումները։ Ըստ Գևորգյանի՝ ապրիլ–մայիս ամիսներին հեղուկ գազը ավանդաբար էժանանում է, իսկ դեկտեմբերին թանկանում, և շուկայում ո՛չ դեֆիցիտ կա, ո՛չ էլ գերիշխող դիրքի չարաշահում։

Վարչապետ Նիկոլ Փաշինյանն արձագանքել է՝ ընդգծելով, որ խնդիրը պետք է լուծվի ավելի լայն՝ խաղաղության և մատակարարման ուղիների դիվերսիֆիկացման համատեքստում։ Նրա խոսքով՝ Հայաստանի համար կարևոր է ունենալ տարբեր մատակարարման աղբյուրներ և ուղիներ, որպեսզի նման սեզոնային ճնշումները չկրկնվեն։ Փաշինյանը վստահեցրել է, որ 2026 թվականի դեկտեմբերին այս խնդիրը չի կրկնվի։

Էկոնոմիկայի նախարար Գևորգ Պապոյանը պարզաբանել է, որ հեղուկ գազը Հայաստան է ներմուծվում հիմնականում երկու ուղղությամբ՝ Վերին Լարսով՝ Ռուսաստանից և Իրանից։ Նրա խոսքով՝ ներկայում երկու ուղղություններով էլ առկա են բարդություններ, ինչի պատճառով կառավարությունն առաջարկում է գործարարներին ավելի ակտիվ օգտվել երկաթուղային հաղորդակցությունից, որը պակաս խոցելի է եղանակային գործոնների նկատմամբ։

Փոխվարչապետ Մհեր Գրիգորյանը ևս նշել է, որ շուկան առաջիկայում կադապտացվի նոր պայմաններին, և հեղուկ գազի ներմուծումները կկազմակերպվեն ավելի համակարգված և կանխատեսելի լոգիստիկ ուղիներով։