16 տարին լրացած անձանց համար նույնականացման քարտ ունենալը կդառնա պարտադիր

Համակարգի ներդրումը կբարձրացնի ծառայությունների թվայնացման մակարդակը։

Կառավարությունը հաստատել է անձը հաստատող փաստաթղթերի ոլորտում օրենսդրական փոփոխությունների փաթեթ, որով նախատեսվում է կենսաչափական նոր համակարգի ներդրում և նույնականացման քարտի պարտադիր կիրառություն։

ՆԳ նախարար Արփինե Սարգսյանի ներկայացմամբ՝ փոփոխությունների նպատակն է մեկ միասնական իրավական դաշտում կարգավորել անձը հաստատող փաստաթղթերի համակարգը՝ համապատասխանեցնելով այն նոր տեխնոլոգիական լուծումներին։

Փաթեթով առաջարկվում է 16 տարին լրացած անձանց համար նույնականացման քարտ ունենալը դարձնել պարտադիր։ Նշվում է, որ կենսաչափական անձնագիր հնարավոր կլինի ստանալ միայն նույնականացման քարտի առկայության դեպքում։

Տարիքային խմբերի համար սահմանվում են տարբեր կարգավորումներ․

  • մինչև 6 տարեկանների համար անձը հաստատող փաստաթուղթը կմնա ծննդյան վկայականը,
  • 6-ից 16 տարեկանների համար նույնականացման քարտը կլինի կամավոր,
  • 16-ից բարձր քաղաքացիների համար՝ պարտադիր։

Նախագիծը փոխում է նաև փաստաթղթերի կիրառման տրամաբանությունը․ ներպետական գործընթացներում հիմնական փաստաթուղթը կլինի նույնականացման քարտը, իսկ անձնագիրը կդիտարկվի որպես ճամփորդական փաստաթուղթ։

Նախատեսվում է կենսաչափական փաստաթղթերի ներդրում նաև օտարերկրացիների, փախստականների և քաղաքացիություն չունեցող անձանց համար։

Բարեփոխումները ներառում են նաև պետություն-մասնավոր գործընկերության մոդել, որտեղ մասնավոր հատվածը չի իրականացնի վարչարարական գործառույթներ, իսկ իրավական որոշումները կմնան պետական կառույցների տիրույթում։

Ըստ նախարարի՝ համակարգի ներդրումը կբարձրացնի ծառայությունների թվայնացման մակարդակը և կնպաստի վարչարարական գործընթացների պարզեցմանը։

Նշվում է, որ նախաձեռնությունը կապ ունի նաև Հայաստան–Եվրամիություն վիզաների ազատականացման գործընթացի հետ։ Կենսաչափական համակարգի ամբողջական ներդրումը նախատեսվում է ավարտել մինչև 2026 թվականի աշուն՝ համապատասխանեցնելով այն միջազգային ստանդարտներին։